Altin Ndoci, 38 vjeç, u arratis nga Spitali i Durrësit më 13 janar. Ai ishte arrestuar fillimisht në vitin 2020 dhe mbi të rëndojnë tetë akuza penale, përfshirë vrasje me pagesë dhe krime të tjera të rënda.
Ndoci akuzohet si ekzekutor në atentatin e 29 dhjetor 2018 në Bradashesh, ku u vranë Endrit Alibejn, Arben Dylgjerin dhe shtetasi turk Erdal Duranay, në një operacion të grupit kriminal të vëllezërve Çopja. Më 1 korrik 2019, në fshatin Broshkë, ai akuzohet për vrasjen e Klevin Baho dhe plagosjen e Aldo Baho. Më 16 janar 2020, Ndoci qëlloi për të vrarë Kei Pikun në Elbasan, por ky i fundit shpëtoi i plagosur.
Ai bashkëpunoi gjithashtu në organizimin e dy atentateve të tjera ndaj rivalëve gjatë periudhës nëntor 2019-janar 2020. Më herët, Ndoci kishte marrë pjesë në grupin që vodhi furgonin e transportimit të parave në Aeroportin Ndërkombëtar të Rinasit.
Prokurorët kanë siguruar prova nga serveri i komunikimeve të enkriptuara Sky ECC, të sekuestruar nga autoritetet franceze. Prokuroria e Posaçme i ka përdorur këto të dhëna për të zbuluar krime të rënda, si vrasje, trafik droge dhe korrupsion.
Arratisja e Ndocit, e organizuar me një automjet që e priste jashtë spitalit, ka nxjerrë në pah numrin e lartë të të akuzuarish si bosë të krimit në arrati. Midis tyre përmenden Talo Çela, Ibrahim Lici dhe Arben Ndoka, të cilët vijojnë të jenë të pakapshëm vite pas shpalljes në kërkim.
Përditësime
Hajdar Bako (alias Hajdar Çopja), një nga dy krerët e bandës Çopja, ka 6 akuza për porositje vrasjesh dhe është në arrati, sipas Policisë së Shtetit.
Talo Çela (54 vjeç) vepron si organizator kryesor i vrasjeve për bandën dhe kontrollon rrjet apartamentesh të blera me emra të rremë.
Suel Çela (37 vjeç) lidhet me grupin.