Altin Ndoci, i paraburgosur për vepra të rënda penale, arriti të arratiset të martën nga kati i tretë i spitalit rajonal të Durrësit, në repartin infektiv me zonë të veçantë sigurie për të paraburgosurit. Ai goditi fizikisht efektivin që e shoqëronte dhe iku.
Mëngjesin e së mërkurës, Task Forca e Prokurorisë vuri në pranga tetë zyrtarë të burgut të Durrësit në kuadër të hetimeve për ngjarjen. Mes tyre janë efektivë policie të shoqërimit, një zëvendës-shef policie dhe një kryeinfermier.
Të arrestuarit janë:
- Aulon Çuko, kryeinfermier në spitalin e Durrësit
- Dezdemon Pazaj, zëvendës-shef policie
- Dorian Saraçi
- Sali Ferollari
- Preng Marvataj
- Fation Baçi
- Aranit Çela
- Violeta Uka
Hetimet po zhvillohen nga Prokuroria për shpjegimin e rrethanave të arratisjes.
Përditësime
Altin Ndoci u arratis rreth orës 13:00 të së martës nga pavioni infektiv i Spitalit të Durrësit. I shoqëruar bashkë me një të dënuar tjetër nga dy efektivë policie, Ndoci kërkoi të shkonte në tualet, goditi një efektiv në befasi dhe iku me një Audi të bardhë që e priste jashtë.
Një efektiv e ndoqi dhe qëlloi me armë në tokë. Plumbi rikoshet në shkallët e infektivit; gëzhoja mungon.
Shërbimi i Kontrollit të Brendshëm në Sistemin e Burgjeve dhe Prokuroria arrestuan 6 efektivë policie dhe zëvendësshefin e burgut (shefi ishte me leje).
Autoritetet konfirmojnë shkelje të protokolleve për numrin e efektivëve gjatë shoqërimit mjekësor.