Autoritetet gjyqësore në Itali ndërmorën një operacion kundërspiunazhi, duke arrestuar dy persona në Romë për shkëmbimin e informacioneve të klasifikuara me palë të huaja. I dyshuari kryesor është një 59-vjeçar, ish-anëtar i shërbimeve të inteligjencës italiane dhe ish-nënoficer i Karabinierëve.
Sipas hetimeve të nisura në maj 2025, i dyshuari kishte siguruar të dhëna sekrete në këmbim të pagesave, duke bashkëpunuar me një agjent të shërbimeve ruse që gëzon imunitet diplomatik në Itali. Informacionet, të lidhura kryesisht me industrinë e mbrojtjes dhe sigurinë kombëtare, janë marrë përmes një rrjeti prej gjashtë burimesh, ku përfshihen katër ushtarakë në detyrë në sektorin e mbrojtjes kibernetike.
Në total, shtatë persona janë implikuar në dosje. Përveç dy të arrestuarve, pesë të tjerë po hetohen në gjendje të lirë për spiunazh politik dhe ushtarak, zbulim të sekreteve shtetërore dhe akses të paligjshëm në sisteme informatike. Gjatë operacionit, në banesën e njërit prej të dyshuarve u sekuestruan 20 mijë euro.
Ministri italian i Mbrojtjes, Guido Crosetto, vlerësoi punën e hetuesve dhe nënvizoi se nuk do të ketë asnjë tolerancë për këdo që rrezikon sigurinë e Republikës. Ndërkohë, kreu i Copasir, Lorenzo Guerini, deklaroi se aktivitetet e inteligjencës ruse janë prej kohësh nën monitorimin e institucioneve të sigurisë italiane. Operacioni u ekzekutua nga Njësia Speciale Operative (ROS) e Karabinierëve.