Prokuroria Themelore në Prishtinë ka njoftuar arrestimin e pesë personave në kuadër të një operacioni të zhvilluar në bashkëpunim me Njësinë Rajonale për Hetimin e Krimeve Ekonomike dhe Korrupsionit. Të dyshuarit janë vënë në pranga nën akuzat për keqpërdorim të pozitës apo autoritetit zyrtar, sipas Kodit Penal të Republikës së Kosovës.
Hetimet tregojnë se të dyshuarit, duke keqpërdorur detyrën zyrtare, kanë pajisur me fletë poseduese personin me inicialet M.S. për një pronë në Fushë Kosovë me sipërfaqe prej 2 hektarësh. Më pas, ky person dyshohet se ka tentuar të kryejë shitblerjen e kësaj prone tek personat me inicialet M.Z. dhe M.Z., duke përdorur dokumente të falsifikuara. Vlera e kësaj prone llogaritet të jetë 1.5 milionë euro.
Pas arrestimit, me urdhër të prokurorit të shtetit, pesë të dyshuarve u është caktuar masa e ndalimit për 48 orë. Organet e rendit vazhdojnë veprimet hetimore për zbardhjen e plotë të rrethanave të këtij rasti.
Përditësime
Prokuroria Themelore në Prishtinë konfirmoi se rasti është nën hetim nga Departamenti për Krime të Rënda. Hetimet ndaj pesë të dyshuarve janë zyrtarizuar për veprat penale të sanksionuara sipas neneve 414 dhe 31 të Kodit Penal të Republikës së Kosovës.
Autoritetet kanë identifikuar pesë personat e ndaluar në kuadër të hetimeve për tjetërsimin e pronës në Fushë Kosovë. Të arrestuarit janë: Adelina Gashi, Liridona Mustafa, Enver Asllani, Driton Gojnovci dhe Gëzim Zogjani, ky i fundit duke mbajtur postin e drejtorit të Pronës. Identifikimi i tyre pason veprimet e ndërmarra nga Departamenti për Krime të Rënda në Prokurorinë Themelore në Prishtinë.