Një 19-vjeçar shqiptar është arrestuar nga karabinierët italianë në Cesenatico, provincën e Forlì-Cesenës, i dyshuar për shpërndarje lëndësh narkotike.
I riu u kap në flagrancë teksa i dorëzonte një blerësi një dozë kokaine me peshë rreth 1,2 gramë. Gjatë kontrollit të menjëhershëm, në xhepin e xhaketës iu gjetën 7 doza të tjera kokaine me peshë totale rreth 5 gramë, si dhe 385 euro para të gatshme, të dyshuara si përfitime nga aktiviteti.
Hetimet u zgjeruan në zonën përreth. Në një kopsht lulesh, ku i riu ishte parë më herët, u zbuluan 56 doza kokaine me peshë rreth 42 gramë, të fshehura në katër kuti metalike çamçakëzi.
Kontrolli në banesën e tij çoi në sekuestrimin e dy dozave kokaine, një doze marihuane, rreth 1.500 euro para të gatshme, dy peshoreve elektronike dhe materialesh për paketimin e drogës.
Gjykata e Forlì-së konfirmoi arrestimin dhe vendosi ndaj tij masën e qëndrimit të detyrueshëm në provincën Forlì-Cesena, deri në seancën e ardhshme gjyqësore në fund të muajit maj.