Shërbimet e Komisariatit të Policisë Kavajë finalizuan operacionin e koduar “Houses” për hetimin e disa vjedhjeve banesash në zonë. Shtetasi G. D., 25 vjeç, banues në Sarandë dhe i dënuar më parë për të njëjtën vepër penale, u arrestua në flagrancë ditën e djeshme në lagjen nr. 2 të Kavajës, menjëherë pas kryerjes së një vjedhjeje në një banesë.
Nga hetimet paraprake rezulton se i arrestuari dyshohet se ka tentuar të kryejë vjedhje edhe në dy banesa të tjera në fshatin Blerimaj. Gjatë operacionit policor u sekuestruan pesë orë dhe tre unaza, të dyshuara si të vjedhura nga ky shtetas.
Materialet procedurale janë referuar Prokurorisë së Durrësit për veprime të mëtejshme. Hetimet vijojnë për zbardhjen e vjedhjeve të tjera të mundshme të kryera nga 25-vjeçari.
Përditësime
Policia e Shtetit zbardhi se 25-vjeçari nga Sarandë kërkohej për vjedhjen e dy banesash në Kavajë, ndërsa u identifikuan tre vjedhje dhe tentativa për vjedhje në banesa.