Shërbimet e Komisariatit të Policisë Shijak ndërhynë mesditën e djeshme në fshatin Rreth, pas marrjes së njoftimit për një vatër zjarri që po rrezikonte zonat e banuara. Nga hetimet paraprake të kryera në vendngjarje, rezultoi se 46-vjeçari me iniciale E. M., banues në të njëjtin fshat, kishte ndezur zjarr në tokën e tij, veprim i cili shkaktoi përhapjen e pakontrolluar të flakëve në sipërfaqe toke të ndara në parcela pranë banesave të fshatit.
Në vijim të veprimeve procedurale, specialistët për Hetimin e Krimeve arrestuan shtetasin E. M. në flagrancë. Ai do të përballet me akuzën për veprën penale “Shkatërrimi i pronës me zjarr”. Materialet hetimore janë referuar pranë Prokurorisë pranë Gjykatës së Shkallës së Parë të Juridiksionit të Përgjithshëm Durrës për ndjekjen e mëtejshme të rastit.
Drejtoria Vendore e Policisë Durrës u ka bërë sërish apel qytetarëve të tregojnë kujdes maksimal dhe të shmangin ndezjen e zjarreve, veçanërisht në afërsi të zonave të banuara dhe sipërfaqeve të mbjella, pasi këto veprime mund të sjellin pasoja të rënda për jetën dhe pasuritë. Policia u bën thirrje qytetarëve që çdo rast të ngjashëm ta denoncojnë në numrin e emergjencës 112, duke garantuar reagim të menjëhershëm dhe të paanshëm.