Policia e Kavajës ka arrestuar në flagrancë shtetasin N. U., banues në fshatin Lekaj të Rrogozhinës, nën akuzën e zjarrvënies. Ngjarja ka ndodhur ditën e djeshme, kur një vatër zjarri e shkaktuar në oborrin dhe në pjesën e pasme të banesës së të dyshuarit është përhapur me shpejtësi.
Si pasojë e flakëve, është djegur një sipërfaqe toke e mbjellë me rreth 250 pemë ulliri dhe pemë të tjera frutore. Zjarri ka përbërë rrezik edhe për banesat e zonës përreth, por ndërhyrja e menjëhershme e shërbimeve të Komisariatit të Policisë Kavajë dhe forcave zjarrfikëse ka bërë të mundur izolimin dhe shuarjen e plotë të flakëve.
Grupi hetimor, pas këqyrjes së vendit të ngjarjes, konstatoi ekzistencën e disa vatrave të zjarrit në pronën e shtetasit N. U.. Specialistët për Hetimin e Krimeve kanë finalizuar arrestimin e tij për veprën penale "Shkatërrimi i pronës me zjarr".
Në lidhje me këtë rast, Drejtoria Vendore e Policisë Durrës ka përsëritur apelin për qytetarët që të shmangin ndezjen e zjarreve për pastrimin e mbetjeve bimore ose për çdo qëllim tjetër, duke theksuar se rreziku për dëmtimin e mjedisit, pronës dhe kërcënimin e jetës mbetet i lartë. Policia u bën thirrje qytetarëve që çdo rast të paligjshëm ta denoncojnë në numrin e emergjencave 112, duke garantuar anonimat dhe reagim të shpejtë.