Ngjarja e rëndë është regjistruar në Roskovec, ku Bledar Bakaj (52 vjeç) është arrestuar nga Policia e Fierit pas denoncimit të një 34-vjeçareje. Sipas dëshmisë së saj në emisionin “Me Zemër të Hapur”, viktima e ka njohur të dyshuarin përmes të afërmve, pasi ai i kishte premtuar një vend pune për të siguruar të ardhura për shpenzimet mjekësore të babait të saj.
Viktima rrëfen se Bledar Bakaj e ka detyruar të hyjë në automjet duke u prezantuar si mjek, e më pas e ka çuar në zonën e Levanit, ku e ka mbajtur peng dhe e ka dhunuar seksualisht. Po ashtu, 34-vjeçarja ka bërë të ditur se i dyshuari ka ushtruar dhunë fizike edhe ndaj babait të saj, 67-vjeçarit E. G., i cili ndodhet i shtruar në Spitalin e Fierit për të marrë ndihmën e nevojshme mjekësore.
Lidhur me përfshirjen e mundshme të deputetes Zegjine Çaushi, viktima ka sqaruar se është takuar me të dy ditë pas ngjarjes, kur ajo kishte shkuar në banesën e saj. Sipas dëshmisë, Bledar Bakaj e ka përzënë deputeten duke i thënë se po u krijonte telashe. E reja ka deklaruar publikisht se deputetja nuk është përgjegjëse për ngjarjen, duke u shprehur se as ajo vetë nuk mund të mbajë përgjegjësi për veprimet e dajës së saj. Aktualisht, e reja vijon të përballet me kërcënime, ndërsa institucionet ligjzbatuese po vijojnë hetimet mbi rastin.
Përditësime
Deputetja Zegjine Çaushi reagoi zyrtarisht në rrjetet sociale lidhur me arrestimin e dajës së saj, Bledar Bakaj. Ajo deklaroi se është njohur me ngjarjen përmes mediave dhe sqaroi se ka kontakte të rralla me të dyshuarin për shkak të numrit të madh të pjesëtarëve në familjen e nënës. Lidhur me lidhjet e saj, deputetja konfirmoi se është takuar rastësisht me bashkëjetuesen e Bledar Bakajt, Merita Gremaj, gjatë muajit qershor.