Prokuroria Speciale e Republikës së Kosovës ka arrestuar të mërkurën të dyshuarin me inicialet S.R., nën dyshimet për sulm ndaj pjesëtarëve të KFOR-it dhe të Policisë së Kosovës në maj të vitit 2023.
Arrestimi është kryer në koordinim me hetuesit policorë nga Drejtoria për Krime të Rënda dhe Krim të Organizuar. Prokuroria ka lëshuar një njoftim për media, ku shpjegon se S.R. dyshohet për sulmin ndaj forcave të sigurisë në atë periudhë, gjatë protestave të majit 2023.
Në njoftim thuhet se për veprimet e mëtutjeshme publiku do të njoftohet në kohë.
Përditësime
S.R. u arrestua në Zveçan më 14 janar 2026 dhe u mbajt në ndalim për 48 orë.
Dyshohet për: bashkim për veprimtari kundërkushtetuese, rrezikimin e personave nën mbrojtje ndërkombëtare, pjesëmarrje në turmë që kryen vepër penale, huliganizëm dhe sulm ndaj personit zyrtar.
Gjatë kontrollit në vendbanimin e tij u gjetën prova materiale.
Prokuroria do të paraqesë kërkesë për paraburgim në Gjykatën Themelore të Prishtinës dhe ka publikuar pamje nga bastisja.
Më shumë se 90 pjesëtarë të KFOR-it u lënduan gjatë përleshjeve në Zveçan.
Dhuna shpërtheu pasi serbët lokalë kundërshtuan hyrjen e kryetarëve të rinj shqiptarë në ndërtesat komunale në Zveçan, Leposaviq dhe Zubin Potok, pas zgjedhjeve lokale të bojkotura.