Një burrë i vetëquajtur magjistar, Karamogo Sinayoko, u arrestua në Bamako të Malit për mashtrim dhe sharlatanizëm. Ai kishte mbledhur rreth 30 mijë euro nga tifozët, të cilët besonin se fuqitë e tij mistike do ta ndihmonin kombëtaren e Malit të fitonte Kupën e Afrikës.
Sinayoko kishte bindur mbështetësit se ishte “i zgjedhur nga Zoti” për të udhëhequr ekipin drejt suksesit. Besueshmëria e tij u rrit pas fitores dramatike ndaj Tunizisë në të tetat e finales. Mali, i mbetur me një lojtar më pak për pjesën më të madhe të ndeshjes, barazoi në minutat e fundit dhe fitoi me penallti. Shumë tifozë e panë këtë si provë të ritualeve të tij.
Pas kësaj, Sinayoko vazhdoi të mbledhë para, duke premtuar përsëritjen e “mrekullisë” në çerekfinale. Megjithatë, Mali humbi 1-0 ndaj Senegalisë. Tifozët e zemëruar u mblodhën para shtëpisë së tij në Bamako, duke hedhur gurë dhe duke dëmtuar ndërtesën.
Policia ndërhyri për të shmangur pasoja më të rënda dhe e arrestoi Sinayokon. Ai deklaroi se nuk mund të kontrollonte rezultatet e ndeshjeve dhe se vendimi përfundimtar i takon Zotit. Rasti ndiqet edhe nga njësi të specializuara në krime informatike, pasi pjesë e parave u mblodhën përmes kanaleve dixhitale.
Ngjarja ka ringjallur debatet mbi rolin e besimeve mistike në futbollin afrikan.