Pas një operacioni të koordinuar ndërkombëtar, shtetasi Valentin Ftoni, 52 vjeç, u lokalizua dhe u arrestua në Nju-Jork, Shtetet e Bashkuara të Amerikës. Hetimi për lokalizimin e tij nisi në gusht të këtij viti, pasi Interpol Tirana ndau informacion me agjencitë amerikane, duke bërë të mundur finalizimin e operacionit në bashkëpunim me agjencitë federale, përfshirë DSS/OCIU pranë Ambasadës së SHBA-së në Tiranë, Shërbimin e Marshallëve të SHBA (USMS) dhe Agjencinë e Emigracionit dhe Doganave (ICE).
Valentin Ftoni ishte shpallur në kërkim ndërkombëtar që prej vitit 2001. Sipas hetimeve, pas largimit nga Shqipëria, ai ka përdorur dokumente të falsifikuara dhe të paktën dy identitete të rreme për të hyrë ilegalisht në territorin amerikan. Gjithashtu, dyshohet se ai ka përdorur edhe një identitet tjetër të rremë, të marrë nga një vend i Amerikës Qendrore. Në të kaluarën, Valentin Ftoni ishte gjykuar për vrasjen e shtetasit Behar Beci, çështje për të cilën është shpallur i pafajshëm.
Ndaj 52-vjeçarit janë dhënë dy vendime dënimi nga Gjykata e Rrethit Gjyqësor Shkodër:
• Më 28 shtator 2001, ai u dënua me 25 vjet burgim për vrasjen me paramendim në bashkëpunim të Gjelosh dhe Ardiana Markaj, ngjarje e ndodhur më 19 shtator 2000 në Ças, Velipojë, për motive gjakmarrjeje.
• Më 18 nëntor 2008, ai u dënua sërish me 25 vjet burgim për vrasjen me paramendim të shtetasit Gac Toma, të kryer më 12 gusht 2001.
Krahas vrasjeve, dënimet përfshijnë edhe veprat penale të mbajtjes pa leje dhe prodhimit të armëve, armëve shpërthyese dhe municionit. Policia e Shtetit është duke vijuar procedurat për ekstradimin e tij drejt Shqipërisë, me qëllim përballjen me drejtësinë për veprat penale për të cilat është dënuar.
Përditësime
Hetimi për lokalizimin e Valentin Ftonit në SHBA nisi në gusht të këtij viti, pas shkëmbimit të informacionit nga Interpol Tirana.
Dokumentet gjyqësore konfirmojnë se Valentin Ftoni është shpallur më parë i pafajshëm për vrasjen e Behar Becit.