Shërbimet e Policisë Kufitare në Aeroportin Ndërkombëtar të Rinasit arrestuan shtetasin italian Vito Cardinale, 61 vjeç, gjatë tentativës së tij për të hyrë në Shqipëri. Ngjarja ndodhi në kuadër të operacionit ndërkombëtar "The Wanted", me qëllim parandalimin e lëvizjes së personave të shpallur në kërkim.
Gjatë verifikimeve të detajuara në hyrje-dalje, rezultoi se Vito Cardinale ishte në kërkim nga autoritetet franceze. Gjykata e Parisit e dënoi atë në vitin 2024 me 2 vjet burgim për mashtrim të kryer në kuadër të një grupi të strukturuar kriminal dhe për pastrim të produkteve të veprimtarisë kriminale.
Hetimet franceze treguan se në vitin 2009 ai ishte pjesë e një zinxhiri tregtarësh që kryenin transaksione mes kompanive franceze, duke shmangur pagesën e TVSH-së. Kjo skemë i shkaktoi shtetit francez një dëm prej rreth 2.5 milionë eurosh. Gjithashtu, ai kishte pastruar fitimet e fituara nga kjo veprimtari.
Interpol Tirana po bashkëpunon me homologët francezë për të përfunduar procedurat e ekstradimit të Vito Cardinale drejt Francës.