Autoritetet policore kanë vënë në pranga rojen e sigurisë së një banke të nivelit të dytë pranë stadiumit "Selman Stërmasi" në Tiranë, pas grabitjes së ndodhur të martën. I arrestuari është Fehmi Çullhaj, rreth 60 vjeç, i cili akuzohet për veprën penale të "shpërdorimit të detyrës".
Sipas hetimeve, roja nuk ndërmori veprimet e nevojshme për të reaguar ndaj autorit në momentin e ngjarjes, duke lehtësuar kështu largimin e tij. Grabitësi dyshohet se e ka ndjekur një shtetase të moshuar, e cila ishte paraqitur në bankë për të depozituar para, dhe ka ndërhyrë sapo ajo ka hyrë në ambientet e institucionit.
Pas marrjes së shumës monetare, autori është larguar nga vendngjarja duke përdorur një skuter, me anë të të cilit ka përfituar nga rrugicat e qytetit për t'iu shmangur kapjes. Policia po vijon veprimet hetimore për identifikimin dhe kapjen e autorit të grabitjes.