Autoriteti Rrugor Shqiptar (ARRSH) ka ndërmarrë një fushatë për mbajtjen pastër të infrastrukturës rrugore, duke paralajmëruar aplikimin e gjobave ndaj të gjithë atyre që hedhin mbeturina nga dritaret e automjeteve apo i braktisin ato përgjatë rrugëve. Institucioni ka theksuar se rrugët e vendit janë pasuri publike dhe se nuk do të tolerohet më asnjë akt papërgjegjshmërie që dëmton pastërtinë e tyre.
Sipas njoftimit zyrtar, masat ndëshkuese do të zbatohen në përputhje me Ligjin nr. 57/2025, datë 16.10.2025, “Për menaxhimin e integruar të mbetjeve”. Shkelësit përballen me sanksione financiare që shkojnë nga 65,000 deri në 200,000 lekë. Për të siguruar zbatimin e kësaj nisme, ARRSH do të intensifikojë bashkëpunimin me Policinë e Shtetit në ditët në vijim.
Kontrollet do të mbështeten kryesisht te përdorimi i kamerave inteligjente, të cilat janë instaluar përgjatë rrjetit rrugor për të dokumentuar rastet e hedhjes së mbetjeve. Përmes këtyre pajisjeve, autoritetet synojnë të identifikojnë mjetin dhe shkelësin, duke mundësuar më pas marrjen e masave ligjore. ARRSH bëri me dije se ekipet e mirëmbajtjes janë çdo ditë në terren, por puna e tyre po vështirësohet nga ndotja e vazhdueshme, duke u bërë thirrje qytetarëve që t'i mbajnë mbeturinat brenda automjeteve dhe t'i depozitojnë ato vetëm në vendet e përcaktuara.
Në thirrjen e tij për zero tolerancë, ARRSH nënvizon se:
- Hedhja e çdo mbetjeje nga automjeti është shkelje e ligjit.
- Automjeti dhe shkelësi do të identifikohen përmes sistemit të monitorimit.
- Çdo shkelje do të dokumentohet me prova vizuale për zbatimin e masës ndëshkuese.