Gazetari Artan Hoxha u shpreh në emisionin Off the Record me Andrea Dangllin në A2 CNN se debati për rrogat e gjyqtarëve tregoi se kreu i Partisë Demokratike, Sali Berisha, është pothuaj në një mendje me kryeministrin Edi Rama.
Sipas Hoxhës, Berisha pranoi se piramida e pagave është ekskluzivitet i qeverisë dhe jo i gjyqësorit. Ai tha se vetë qeveria e ka përmbysur këtë piramidë duke vendosur rroga shumë më të larta për gjyqtarët e GJKKO-së dhe prokurorët e SPAK-ut, dy deri në tre herë më të mëdha se ajo e kreut të shtetit.
"Kur debati vjen te kjo pjesa e rrogës së gjyqtarëve, e dëgjova me vëmendje sot dhe Berishën ishte pothuaj në një mendje me Ramën. Është ekskluzivitet i qeverisë kjo gjë. Piramidën e pagave e vendos qeveria, por Berisha tha se Rama e prishi vetë piramidën", u shpreh Hoxha.
Ai e cilësoi këtë çështje si minore, duke thënë se Rama po përpiqet të kursejë rreth 37 milionë euro në buxhet. Problemi i vërtetë, sipas tij, është gjendja e të gjithë sistemit të drejtësisë, me mungesë gjyqtarësh, stok dosjesh të pesëfishuara dhe qytetarë që presin me vite për drejtësi.
Hoxha theksoi mungesën e vendimeve përfundimtare dhe konfiskimit të pasurive të zyrtarëve të lartë, duke lënë reformën në drejtësi me rezultate të pjesshme. Ai përmendi rastin e Fredi Bejlerit, i cili përfundoi procesin shpejt, u bë eurodeputet nga burgu i Fierit dhe tani është nisur për në Strasburg.