Ndeshja e parë e gjysmëfinales së Champions League midis Atlético Madrid-it dhe Arsenal-it, zhvilluar në Madrid, përfundoi me barazimin 1-1. Të dy golat u shënuan nga penallti.
Gjatë takimit u akorduan tre penallti. Dy prej tyre u konfirmuan nga VAR-i dhe sollën golat e ndeshjes. Penalltia e tretë, e dhënë fillimisht për Arsenal-in në fund të takimit, u anulua pas rishikimit në monitor nga gjyqtari holandez Danny Makkelie.
Trajneri i Arsenal-it, Mikel Arteta, shprehu zhgënjimin e thellë pas vendimit. "E pranoj penalltinë e dhënë kundër nesh, por nuk mund ta pranoj anulimin e asaj që na u mohua me VAR. Arbitri e pa tre herë episodin dhe ndryshoi vendim. Është çështje uniformiteti, sidomos duke krahasuar me ndeshjen PSG-Bayern Munich. Ky mund të ishte një gol vendimtar për kualifikimin", deklaroi Arteta.
Ndërkohë, trajneri i Atlético Madrid-it, Diego Simeone, kishte qëndrim të kundërt. Ai vlerësoi se në gjysmëfinale të Champions League akordohen vetëm penalltitë të cilat janë vërtet penallti. Për penalltinë e parë, ai tha se kishte kontakt nga pas, por lojtari e parashikoi dhe u rrëzua. Sa i përket asaj të Arsenal-it, Simeone theksoi se VAR-i ndonjëherë jep përfitimin e dyshimit dhe ndonjëherë e heq atë.
Ndeshja e kthimit do të zhvillohet në Angli, ku gjithçka mbetet e hapur për kualifikimin në finale.