Asambleja e Përgjithshme Zgjedhore e Federatës Shqiptare të Futbollit (FSHF) mbahet të hënën, më 16 shkurt, në ora 10:00, në "Shtëpinë e Futbollit" në Tiranë. Në këtë mbledhje zgjidhet Presidenti i FSHF-së për një mandat katërvjeçar dhe 10 anëtarë të Komitetit Ekzekutiv.
Për postin e Presidentit është regjistruar vetëm kandidatura e Armand Dukës, i propozuar nga 33 anëtarë të federatës. Duka drejton FSHF-në që nga viti 2002 dhe synon mandatin e shtatë.
Kandidatët për Komitetin Ekzekutiv
Sipas Komisionit të Verifikimit, për 10 vendet në Komitetin Ekzekutiv janë propozuar 13 kandidatë:
- Abdyl Kuriu
- Anila Basha
- Arben Dervishaj
- Armando Cungu
- Blendi Fevziu
- Edmond Hasanbelli
- Envi Hicka
- Erind Resuli
- Ervin Canollari
- Geri Çipi
- Gjergji Petro
- Lutfi Nuriu
- Pano Xhixho
Agenda e Asamblesë
Në mbledhje shqyrtohet raporti i veprimtarisë së FSHF-së mes dy asambleve të fundit, prezantohet bilanci financiar dhe pasqyrat financiare, si dhe raporti i auditorëve të pavarur dhe të jashtëm.
Miratohen pasqyrat financiare të audituara për vitin 2025, buxheti për vitet 2026 dhe 2027, si dhe emërohen audituesit e pavarur dhe të jashtëm me propozim të Komitetit Ekzekutiv.
Asambleja transmetohet drejtpërdrejt në FSHF TV dhe në kanalin zyrtar të FSHF-së në YouTube, duke filluar nga ora 10:00.
Përditësime
Armand Duka u rizgjedh për herë të shtatë si president i FSHF-së me 48 vota pro, 0 kundër dhe 0 abstenim. Rezultati konfirmohet zyrtarisht.