Sipas raportit të Agjencisë së Statistikave të Kosovës (ASK) për Anketën e Ekonomive Bujqësore (AEB) 2025, toka bujqësore e shfrytëzuar në vend është zgjeruar për 510.9 hektarë. Livadhet dhe kullosat, duke përfshirë tokën e përbashkët, mbeten kategoria dominuese me 51.5% të sipërfaqes së përgjithshme, ndërsa tokat e punueshme përbëjnë 45%.
Në kategorinë e tokave të punueshme, që gjithsej kapin 189,131.22 hektarë, dominimin e mbajnë drithërat me 128,190.63 hektarë, ku gruri mbetet kultura kryesore me 82,633.65 hektarë. Raporti evidenton gjithashtu se 6,104.38 hektarë tokë bujqësore kanë mbetur djerrinë gjatë vitit 2025. Për sa i përket infrastrukturës dhe përkujdesjes, 34,240.28 hektarë janë ujitur të paktën një herë, ndërsa 123,045.50 hektarë janë trajtuar me pesticide.
Sektori i blegtorisë ka shënuar gjithashtu zhvillime pozitive. Numri i gjedheve ka arritur në 241,423 krerë, krahasuar me 240,848 në vitin 2024, ndërsa numri i deleve është rritur në 211,178 krerë, nga 209,947 sa ishin një vit më parë. Prodhimi i qumështit gjatë kësaj periudhe ka arritur në 360.2 milionë litra, ndërsa prodhimi i mishit karkas brenda ekonomive bujqësore është llogaritur në 11.5 milionë kilogramë. ASK bën të ditur se metodologjia e kësaj ankete është e harmonizuar plotësisht me standardet e Eurostat.