Arben Shahini rrëfen anën e panjohur të ngjarjeve të 20 shkurtit 1991 në Tiranë, ku Astrit Hatellari vendosi litarin në grykën e statujës së Enver Hoxhës.
Më 19 shkurt 1991, rreth orës 15:00, Plenumi i Komitetit Qendror të PPSH-së doli me një deklaratë ku theksonte se kushtet e jetesës së studentëve ishin përmirësuar dhe u refuzua kërkesa e tyre për heqjen e emrit të Enver Hoxhës nga Universiteti i Tiranës, duke e cilësuar si të pabazuar. Qëndresa e Komitetit Qendror mori fund pas dy muajsh, kur emri u hoq.
Forca të shumta speciale të ruajtjes së rendit dhe të ndërhyrjes së shpejtë, të pajisura me skafandra kauçuku, shkopinj gome, gaz lotsjellës dhe qen kufiri, kishin bllokuar rrugën nga Liceu Artistik drejt godinës së Radio-Televizionit. Gjithashtu kishin bllokuar rrugën automobilistike me dy makina IFA të ushtrisë.
Një zjarrfikëse e madhe lëshoi me presion ujë me ngjyrë të kuqe në një rreze prej 20-30 metrash, duke lagur protestuesit. Nga presioni i madh, shumë gra dhe fëmijë u rrëzuan, midis tyre edhe Liri Berisha me djalin e saj të vogël, Shkëlzenin. Liri Berisha u dëmtua në sy nga presioni i ujit.
Kjo irritoi protestuesit, të cilët u drejtuan drejt gardhit të madh të policisë dhe forcave të ndërhyrjes së shpejtë. Policia zmbrapsi një pjesë të tyre deri te ish-Shkolla Kosova, ku ndodhën përleshje me tulla e tjegulla. Turma kryesore prej mijëra vetash, duke valëvitur flamuj kombëtarë, suli gardhin e ushtrisë dhe policisë pas përleshjeve të pandalshme.