Autoritetet policore në Athinë po hetojnë një sulm të armatosur ndaj një biznesi në zonën e Agios Panteleimonas, i cili dyshohet se është pjesë e një përplasjeje për larje hesapesh mes grupeve kriminale. Katër persona të armatosur, të cilët udhëtonin me një automjet të vjedhur në zonën e Vrilissias, qëlluan rreth 25 herë me armë të tipit kallashnikov. Pas sulmit, autorët u larguan dhe automjeti i përdorur u gjet i djegur në Aspropyrgos, ku brenda tij u sekuestrua edhe arma e zjarrit.
Nga breshëria e plumbave mbeti e plagosur në këmbë një vajzë 10-vjeçare, e cila është vajza e partneres së pronarit të lokalit, Denis Luli. Fëmija u transportua për në spital nga e ëma. Hetuesit e Drejtorisë për Luftën Kundër Krimit të Organizuar (DAOE) po shqyrtojnë lidhjen e mundshme të këtij sulmi me trafikun e drogës, duke përfshirë në hetime edhe rolin e mundshëm të të burgosurit shqiptar Klodian Lekocaj.
Denis Luli, 30 vjeç, është një person i njohur për autoritetet greke për shkak të precedentëve penalë. Në vitin 2016, ai u përfshi në një çështje për një plantacion marijuane në Arta, ku dyshohet se qëlloi ndaj policisë para se të arratisej. Pasi u arrestua, ai u lirua nga burgu i Malandrinosit në vitin 2021 me masa kufizuese, ndërsa në vitin 2025 u përmend sërish në një rast për sasi të vogël droge. Deri në këto momente, Luli ka refuzuar të bashkëpunojë me hetuesit. Megjithatë, burime nga hetimi bëjnë me dije se ai dyshohet se kishte paralajmëruar një punonjës të lokalit që, nëse dikush do ta kërkonte, të pretendonte se nuk e kishte parë, gjë që rrit dyshimet se ai ishte në dijeni të rrezikut ndaj jetës së tij.