Klubi spanjoll Athletic Bilbao ka njoftuar arritjen e marrëveshjes me trajnerin gjerman Edin Terzic për të marrë drejtimin e ekipit të parë për dy sezonet e ardhshme. Kontrata e tij do të jetë e vlefshme deri më 30 qershor 2028.
Terzic do të zëvendësojë Ernesto Valverde, i cili do të largohet nga pankina pas përfundimit të sezonit aktual në La Liga. Prezantimi zyrtar i trajnerit të ri pritet sapo të mbyllen katër ndeshjet e mbetura të kampionatit.
Ish-tekniku i Borussia Dortmund ka një karrierë të suksesshme te skuadra gjermane. Ai fitoi Kupën e Gjermanisë në vitin 2021, udhëhoqi ekipin drejt vendit të dytë në Bundesliga në sezonin 2022/23 dhe arriti finalen e Ligës së Kampionëve në edicionin 2023/24, ku u mposht nga Real Madrid.
Marrëveshja midis Athletic Bilbao-së dhe Terzic-ut u arrit prej disa javësh, por u mbajt sekrete deri në përfundimin e fazës vendimtare të sezonit. Presidenti i klubit, Jon Uriarte, kishte rënë dakord me trajnerin gjerman gjatë periudhës së kandidimit për rizgjedhje. Terzic, 43 vjeç, ka mbajtur role të ndryshme në strukturat e Dortmund-it dhe ka punuar si ndihmëstrajner në klube të tjera europiane.