Fondi i Sigurimit të Detyrueshëm të Kujdesit Shëndetësor (FSDKSH) ka pasur 10 drejtues nga viti 2015 deri në 2025. Drejtuesi i fundit, Spartak Zekja, është vendosur nën hetim nga Prokuroria e Tiranës, ndërsa posti i tij është zënë nga Arti Papajani.
Raportet zyrtare tregojnë probleme të shumta në FSDKSH me pagesat ndaj koncesioneve, recetën elektronike dhe përditësimin e barnave të rimbursueshme. Auditimi ka shqyrtuar kryesisht vitin 2024, duke analizuar edhe vitin 2023 dhe periudha të mëparshme.
Në vitin 2023, për koncesionin e Kontrollit Mjekësor Bazë (Check-up), FSDKSH ka paguar 876 milionë lekë për 475 mijë kontrolle të planifikuara, ndërsa realisht janë kryer 467 mijë kontrolle. Kontrata e këtij koncesioni u firmos në janar 2015 dhe parashikon pagesë fikse vjetore, pavarësisht realizimit real.
Megjithë rritjen e numrit të kontrolleve në 2023 krahasuar me 2022, janë rritur sëmundjet kronike, recetat e rimbursuara dhe shtrimet në spital. Sipas auditimit, efekti i kësaj mase nuk ka qenë i dukshëm në uljen e sëmundshmërisë.
Për vitin 2024, auditi ka evidentuar dobësi në monitorimin e kontratave koncesionare. Në rastin e Check-up, pagesat bazohen kryesisht në të dhëna statistikore, pa dokumentacion të plotë për përmbushjen e detyrimeve kontraktuale. Gjithashtu, mungon dokumentimi i sistemeve të kontrollit të brendshëm dhe mekanizmave për raportimin e problematikave.
Në koncesionin e laboratorëve për 2024, janë kryer 4,6 milionë ekzaminime me kosto totale 1,89 miliardë lekë, që përbën 102,6% të tavanit buxhetor të planifikuar. Eksperti Dasho ka deklaruar: «Të gjitha këto kontrata kanë probleme, disa me nevojën, por edhe aty ku punojnë mirë dhe aty».