Studiuesi dhe historiani Auron Tare ka publikuar një analizë mbi protestat që vijojnë prej afro dy muajsh në bulevardin kryesor të Tiranës. Në një shkrim të titulluar "Beteja e Athinës", ai vlerëson se kjo qëndresë qytetare mund të shënojë ndryshimin e nevojshëm për të thyer atë që ai e cilëson si një "mallkim historik", ku shqiptarët kanë ndërtuar histori për të tjerët, por kanë mbetur spektatorë në vendin e tyre.
Sipas Tares, shqiptarët kanë qenë shpesh mjeshtër për të ndërtuar perandori të huaja, por "nxënës të dobët" në shkrimin e fatit të tyre sovran. Për të argumentuar këtë tezë, ai sjell në vëmendje një episod historik të korrikut të vitit 1822, gjatë Luftës për Pavarësinë Greke. Në fushat e Athinës, dy ushtri të kundërta drejtoheshin nga dy figura me origjinë shqiptare:
- Kapedan Jani Gura, prijës i forcave që luftonin për kauzën greke.
- Omer Pashë Vrioni, gjeneral në shërbim të Perandorisë Osmane, i dërguar për të shtypur kryengritjen.
Historiani shpjegon se, në atë përplasje, shqiptarët luftonin nën flamuj që nuk ishin të tyre, ndërsa thekson se historia e përvehtësoi kontributin e tyre, duke e shpallur njërin hero të Greqisë dhe tjetrin pjesë të historisë osmane.
Duke e lidhur këtë me aktualitetin politik, Auron Tare shpreh optimizëm se lëvizja aktuale në Tiranë mund të shërbejë si një moment reflektimi, ku shqiptarët do të mësojnë më në fund të luftojnë për të drejtat e tyre dhe të shkruajnë vetë historinë e Shqipërisë.