Prokuroria Publike e kantonit të Lucernit ka hapur një procedurë penale ndaj kapitenit të kombëtares së Zvicrës, Granit Xhaka, lidhur me dyshimet për sigurimin e certifikatave të falsifikuara të vaksinimit kundër COVID-19. Hetimi ka nisur pas kontrollit të kryer nga policia në vitin 2023 në ordinancën e një mjekeje në Lucern, e cila dyshohet se kishte lëshuar dokumente të rreme vaksinimi për disa pacientë. Autoritetet synojnë të përcaktojnë nëse Xhaka ka përfituar certifikata pa kryer procesin e vaksinimit.
Zëdhënësi i futbollistit, Andreas Bantel, ka deklaruar se Xhaka po bashkëpunon plotësisht me organet e drejtësisë dhe është transparent lidhur me këtë çështje. Sipas tij, futbollisti posedon konfirmim nga mjeku se është vaksinuar dy herë: dozën e parë më 25 janar 2022 dhe të dytën më 11 nëntor 2022. Edhe mbrojtja ligjore e mjekes, përmes avokatit Cornel Borbely, këmbëngul se procedura është kryer sipas rregullave dhe se klientja e tij e ka vaksinuar personalisht lojtarin.
Zëdhënësi i Prokurorisë, Simon Kopp, ka konfirmuar se procedurat po zhvillohen për të verifikuar nëse janë kryer vepra penale në lidhje me mashtrimin ose falsifikimin e dokumenteve. Deri në përfundimin e hetimeve dhe marrjen në pyetje të planifikuar për fillim të tetorit, palët e përfshira konsiderohen të pafajshme. Granit Xhaka, 33 vjeç, aktualisht është pjesë e skuadrës angleze Sunderland, pas transferimit nga Bayer Leverkusen në korrik të vitit 2025. Federata Zvicerane e Futbollit nuk ka dhënë komente mbi rastin, duke u shprehur se nuk ka informacion të besueshëm për situatën.