Avdullah Hoti, deputet i zgjedhur i LDK-së, ka reaguar për situatën me energjinë elektrike, ku më 14 janar 2026 kanë nisur reduktimet e furnizimit.
Në një postim në Facebook, Hoti shkruan se "keqmenaxhimi i sektorit të energjisë elektrike po i kthehet qytetarëve si ndëshkim kolektiv". Ai thekson se pas viteve pa investime, pa planifikim dhe pa përgjegjësi, KOSTT ka dalë me njoftime për reduktime.
Hoti vlerëson si të papranueshme që në vitin 2026 qytetarët dhe bizneset të përballen me ndërprerje të rrymës për shkak të dështimeve të atyre që kanë pasur pushtetin dhe buxhetin. "Askush nuk mund të fshihet pas njoftimeve teknike, kur përgjegjësia është politike dhe direkte", shprehet ai.
Ai shton se "energjia nuk është luks, është e drejtë themelore". Çdo reduktim, sipas Hotit, është dëshmi e keqmenaxhimit, mungesës së vizionit dhe neglizhencës ndaj interesit publik.
Në fund, Hoti deklaron se qytetarët po paguajnë çmimin e dështimit të Qeverisë Kurti me errësirë, dëme ekonomike dhe pasiguri.