Pas deklaratave të nënkryetarit të LDK-së, Lutfi Haziri, i cili në emisionin "Pressing" në T7 sugjeroi një "marrëveshje pako" me Lëvizjen Vetëvendosje për, siç u shpreh, "stabilitet e normalitet të vendit", ka reaguar deputeti Avdullah Hoti.
Hoti i ka cilësuar këto sinjale si eksperimente, duke u shprehur kategorikisht kundër kësaj ideje. Në qëndrimin e tij, ai argumentoi se rezultatet e zgjedhjeve të fundit kanë dhënë një mesazh të qartë për nevojën e rikthimit të partisë te elektorati tradicional, te vlerat dhe te vizioni mbi të cilin është ndërtuar LDK.
Ruajtja e vlerave të LDK-së
Sipas Hoti-t, partia duhet të luftojë çdo mentalitet që dobëson aleancat historike dhe cenon orientimin euroatlantik të Kosovës. Ai theksoi se LDK-ja është një institucion politik më i madh se çdo individ.
"Eksperimente me LDK-në dhe me të ardhmen e saj nuk do të ketë. LDK nuk është pronë e askujt dhe nuk mund të jetë peng i interesave personale. Ajo është një mision politik dhe historik", ka deklaruar Hoti.
Ky reagim pason debatin e hapur brenda strukturave të partisë lidhur me strategjinë politike që duhet të ndjekë LDK-ja pas procesit të fundit zgjedhor.