Ish-kryeministri i Kosovës, Avdullah Hoti, ka sqaruar se zhvillimet brenda Lidhjes Demokratike të Kosovës (LDK) në lidhje me Kuvendin e jashtëzakonshëm për fatin e kryetarit Lumir Abdixhiku janë procese të ndara nga negociatat për qeverisje me Lëvizjen Vetëvendosje.
Sipas Hotit, nisma për këtë Kuvend vjen si rezultat i humbjeve të njëpasnjëshme zgjedhore dhe mosrespektimit të standardit të vendosur në vitin 2021, ku lidershipi i partisë duhet të ndërrohet për shkak të rezultateve të dobëta. Ai theksoi se pakënaqësitë në parti nuk kanë lindur brenda natës.
Duke analizuar situatën politike, Hoti vlerësoi se rezultatet e zgjedhjeve të fundit tregojnë se Lëvizja Vetëvendosje e Albin Kurtit nuk ka nevojë për mbështetjen e LDK-së për të krijuar qeverinë. Megjithatë, ai shtoi se partia do të jetë bashkëpunuese në proceset institucionale, si konstituimi i Kuvendit të Kosovës dhe zgjedhja e presidentit.
"Nëse të gjitha dallimet programore mes forcave politike zhduken vetëm e vetëm për të ndarë pushtetin, atëherë nuk mbrohet interesi shtetëror", theksoi Hoti në një intervistë për Gazetën Express. Ai shprehu rezerva ndaj qeverisjes së tanishme, duke vlerësuar se Lëvizja Vetëvendosje nuk meriton të drejtojë vendin.
Lidhur me të ardhmen e LDK-së, Hoti propozoi një proces statutar, gjithëpërfshirës dhe konkurrent për zgjedhjen e strukturave udhëheqëse, nga niveli i nëndegëve e deri te kryetari. Sipas tij, procesi duhet të jetë demokratik dhe i bazuar në një debat të hapur, ku çdo anëtar përfshihet në vendimmarrje.