Një incident serioz ajror ka ndodhur të hënën gjatë fluturimit 1760 të kompanisë American Airlines, i cili ishte nisur nga aeroporti i Myrtle Beach, Karolina e Jugut, me destinacion Charlotte, Karolina e Veriut. Pak çaste pas ngritjes, avioni tip Boeing 737 u përplas me zogj, çka shkaktoi probleme të menjëhershme në motorin e majtë të mjetit fluturues.
Sipas komunikimeve të regjistruara me kullën e kontrollit të trafikut ajror, kapiteni njoftoi për një problem me motorin dhe kërkoi të rikthehej menjëherë në aeroport. Një tjetër pilot, i cili ndodhej në afërsi dhe pati kontakt vizual me ngjarjen, raportoi në radio se zogjtë kishin goditur motorin e majtë të avionit. Pasagjeri Patrick Gottwald ka regjistruar pamje filmike ku shfaqen flakët që dalin nga motori, ndërsa avioni po fluturonte mbi zonën detare.
Pas sinjalit të emergjencës, avioni kreu manovrat e nevojshme për t'u rikthyer në aeroportin e Myrtle Beach. Ekipet e emergjencës në tokë u mobilizuan paraprakisht për të asistuar uljen. Avioni preku pistën pa incidente të tjera dhe të gjithë pasagjerët zbritën në mënyrë të sigurt. Përplasjet e këtij lloji, të njohura si "bird strikes", janë shkaqe të njohura për dëmtime të tilla në motorët e avionëve gjatë fazave kritike të fluturimit.
Përditësime
Hetuesit gjetën mbetje shpendësh në pistën e aeroportit, të cilat janë dërguar për analizë pranë Smithsonian Institution. Në momentin e incidentit, avioni po transportonte 181 pasagjerë dhe kishte si destinacion fillestar Charlotte, Karolina e Veriut.