Një fluturim i kompanisë EasyJet, me destinacion Berlinin, u ndërpre mbrëmjen e kaluar pasi avioni u detyrua të kthehej në Aeroportin Ndërkombëtar të Prishtinës. Sipas dëshmive të pasagjerëve në bord, shkaku i kthimit lidhet me goditjen e një shqiponje në njërin prej motorëve të avionit, menjëherë pas ngritjes nga pista.
Goditja dyshohet se ka shkaktuar dëmtim në turbinën e motorit, duke detyruar pilotin të ndërmarrë masat e sigurisë. Avioni qëndroi për rreth 20 minuta në ajër përpara se të kryente uljen emergjente, e cila u realizua me sukses dhe pa pasoja për personat në bord. Pasagjerët kanë vlerësuar qetësinë dhe profesionalizmin e ekuipazhit gjatë menaxhimit të situatës.
Pas uljes së sigurt, kompania ajrore ka anuluar fluturimin drejt kryeqytetit gjerman. Deri në këto momente, as EasyJet dhe as zyrtarët e Aeroportit Ndërkombëtar të Prishtinës nuk kanë njoftuar zyrtarisht shkaqet teknike të incidentit apo procedurat e mëtejshme për udhëtarët.