Sekretari i përgjithshëm i Aleancës, Avni Arifi, ka konfirmuar se 7 deputetët e këtij subjekti politik do të marrin pjesë në seancën konstituive të Kuvendit. Megjithatë, vota e tyre për zgjedhjen e kryetarit të Kuvendit dhe të presidentit mbetet e kushtëzuar nga plotësimi i 6 kërkesave specifike të Aleancës.
Në një intervistë për RTV21, Arifi shprehu kritika ndaj qeverisjes së kryeministrit Albin Kurti, duke e cilësuar sjelljen e tij si "arrogancë të numrave". Sipas Arifit, kjo qasje e ekzekutivit është arsyeja kryesore pse kërkesat e subjektit të tij nuk janë marrë parasysh deri më tani.
"Nëse ata dëshirojnë të jetojnë me këtë arrogancë të numrave, është në rregull, por nuk i kanë 7 deputetët tanë, prandaj le ta gjejnë kuorumin diku tjetër", deklaroi Arifi. Ai theksoi gjithashtu se Aleanca nuk ka kërkuar favore politike apo përfshirje në strukturat e Qeverisë, por kërkon trajtimin e çështjeve të paraqitura nga partia e tij.