Dhoma Vendore e Avokatisë Durrës zhvilloi një bojkot të organizuar të seancave gjyqësore gjatë orarit 08:00-10:00, në shenjë proteste dhe solidariteti pas plagosjes me armë të avokatit Elton Shllaku. Ngjarja ndodhi pasditen e së mërkurës, në një lokal në shëtitoren Taulantia, në lagjen nr. 1 të qytetit bregdetar. Përjashtim nga ky bojkot bënë vetëm seancat që kanë për objekt shqyrtimin e masave të sigurimit.
Sipas të dhënave nga Gjykata e Durrësit, bojkoti ndikoi drejtpërdrejt në 21 seanca gjyqësore. Në seksionin penal ishin planifikuar 7 seanca, ndërsa në seksionin civil, në godinën në Shkozet, ishin planifikuar 14 seanca. Ndikimi në seksionin civil ishte më i kufizuar, pasi prania e avokatit për palët nuk është e detyrueshme.
Kreu i Dhomës Vendore të Avokatisë Durrës, Lorval Petani, theksoi se rastet e përsëritura që rrezikojnë sigurinë e avokatëve kërkojnë vëmendje dhe mbrojtje më të madhe institucionale. Dhoma u ka kërkuar Prokurorisë dhe Policisë së Durrësit një hetim të shpejtë dhe të plotë për zbardhjen e rrethanave. Disa media raportojnë se plagosja dyshohet se lidhet me një konflikt për çështje pronësie dhe se policia është në kërkim të autorit të dyshuar, Fatmir Ferhati. Çështja e sigurisë së avokatëve pritet të jetë pjesë e diskutimeve në mbledhjen e ardhshme të Këshillit të Përgjithshëm të Dhomës Kombëtare të Avokatisë.