Gjykata në Kosovë ka shpallur aktgjykimin për vrasjen e Liridona Ademajt, duke dënuar Naim Murselin dhe Granit Plavën me burgim të përjetshëm, ndërsa Kushtrim Kokallën me 30 vjet burgim.
Avokati i familjes Ademaj, Leutrim Syla, në një konferencë për shtyp pas vendimit, deklaroi se "sot drejtësia foli" dhe se vendimi për dy të dënuarit kryesorë është marrë në përputhje me provat e paraqitura.
Ai theksoi se dënimi ndaj Kushtrim Kokallës është pothuajse burgim i përjetshëm dhe do të apelojë në Gjykatën e Apelit.
"Edhe pse si i tillë nuk parashihet me kod pasi ishte vetëm 30 vjet në kohëzgjatje, por duke pasur të drejtën për ankesë, konsideroj se do të bëjmë apel", u shpreh Syla.
Avokati vlerësoi punën e hetuesve policorë, të cilët menjëherë vërtetuan se ngjarja nuk ishte grabitje, por vrasje e rëndë. Ai falënderoi gjithashtu mediat dhe publikun për mbështetjen e dhënë familjes gjatë procesit.
Sipas Sylës, familjes i ka lehtësuar dhimbja pas këtij vendimi, ndonëse procesi gjyqësor ka qenë i ngarkuar.