Florim Mustafaj, babai i 17-vjeçares Genta Mustafaj, e cila u vra në sulmin ndaj autobusit në Gllogjan, ka adresuar kritika të rënda ndaj sistemit të drejtësisë pas lirimit të të akuzuarve në këtë çështje. Në një deklaratë për emisionin "Kosova Live" në televizionin T7, ai shprehu zhgënjimin e tij për zhvillimet e fundit.
"Shteti s’po bën kurgjo, po lirohen të akuzuarit, tash na po dalim nëpër qytet, po vritemi, po i mbajmë nga 5 vjet burg e kurgjo", u shpreh Mustafaj. Ai theksoi se për pesë vite, familjarët e viktimave kanë përjetuar dhimbje të vazhdueshme, duke pritur që organet kompetente të sigurojnë zbardhjen e plotë të këtij rasti tragjik.
Babai i viktimës nënvizoi se, nëse personat e liruar nuk janë përgjegjës për vrasjen, institucionet e sigurisë dhe ato të drejtësisë kanë për detyrë të identifikojnë autorët e vërtetë të sulmit. "Le t’i gjejnë të tjerët, por mos na krijojnë probleme dhe dhimbje", deklaroi ai. Familja e Gentës vijon të kërkojë drejtësi për vajzën e tyre, si dhe për viktimat e tjera të sulmit të ndodhur në Gllogjan.