Agim Bahtiri, deputet i Lëvizjes Vetëvendosje, ka postuar në Facebook një fotografi me Rifat Jasharin, anëtar i familjes Jashari, ku shkruan se “nga Jasharët gjithmonë lind drita e Kosovës”.
Ky postim erdhi pas vizitës së kryeministrit Albin Kurti të dielën në Prekaz. Në shkrimin e tij, Bahtiri thekson se historia e Kosovës është libër me shumë faqe, ku shumë prej tyre janë shkruar me gjak e lavdi.
Ai shton se familja e lavdishme Jashari është një faqe e librit që nuk mbyllet kurrë, sepse ka familje që janë si malet: nuk lëkunden, nuk shuhen, vetëm rriten në madhështi. “Kur gjaku i derdhur bëhet themel, sakrifica bëhet udhëheqje. Nga Jasharët gjithmonë lind drita e Kosovës”, ka përfunduar Bahtiri.
Sipas një burimi, ky postim lidhet me preferencën e Lëvizjes Vetëvendosje për të zgjedhur dikë nga familja Jashari si president të ardhshëm të Kosovës.