Avokati Ardian Bajraktari tha se katër javët e ardhshme duhet të shfrytëzohen për shqyrtim serioz dhe profesional të ligjit për ndryshimin e Ligjit për Dhomat e Specializuara dhe Zyrën e Prokurorit të Specializuar. Presidentja e Republikës e ka kthyer ligjin në Kuvend për rishqyrtim.
Në një postim, Bajraktari shpjegoi se, sipas Rregullores së Kuvendit, kryetarja e Kuvendit ia dërgon ligjin për shqyrtim komisionit përgjegjës-raportues dhe deputetëve. Në këtë rast, komisioni përgjegjës-raportues është Komisioni për Legjislacion, i cili duhet të përgatisë raportin për seancën plenare brenda katër javëve nga dita e pranimit të ligjit.
Pas shqyrtimit në komision, ligji kthehet në seancë plenare, ku Kuvendi vendos për të. Bajraktari e cilësoi këtë afat si mundësi për reflektim dhe tha se periudha duhet të përdoret për shqyrtimin e vërejtjeve dhe eliminimin e elementeve që mund të paraqesin probleme kushtetuese.
Ai bëri thirrje për një proces gjithëpërfshirës, profesional dhe të bashkërenduar. Sipas tij, konsultimet me aleatët ndërkombëtarë, veçanërisht me Bashkimin Evropian, duhet të nisin pa vonesë, me synimin për përmbushjen e zotimeve ndërkombëtare.