Në seancën plenare të sotme në Kuvend, kreu i Grupit Parlamentar të Partisë Socialiste, Taulant Balla, kërkoi shtyrjen e diskutimit për ndryshimet në Kodin Rrugor. Kërkesa u bë për të dhënë më shumë kohë për shqyrtimin e propozimeve të reja.
Kjo iniciativë erdhi pas ngjarjes së rëndë të ndodhur ditën e diel në Durrës, ku humbën jetën dy fëmijë. Balla nënvizoi se dy deputetë të Partisë Socialiste kanë depozituar amendamente që synojnë marrjen e masave parandaluese ndaj drejtuesve të mjeteve të papërgjegjshëm.
Ai theksoi nevojën për angazhimin e grupit parlamentar të Partisë Demokratike, komisionit përkatës dhe ministrisë përgjegjëse, me qëllim arritjen e një konsensusi të plotë. "Nisur nga diskutimet që bëmë ditën e hënë, nga të dyja krahët e kësaj salle, të cilët me të drejtë iu referuan ngjarjes së rëndë që ndodhi ditën e diel në Durrës, deputetë të PS kanë propozuar disa amendamente... kërkojmë shtyerjen e diskutimit të kësaj çështjeje, me qëllim që të kemi konsensusin e duhur", deklaroi Balla.
Balla shprehu bindjen se palët do të bien dakord për shtyrjen, duke lejuar shqyrtimin e detajuar të propozimeve nga të gjithë aktorët e përfshirë.
Përditësime
Kuvendi miratoi kërkesën e Ballës për shtyrjen e diskutimit mbi Kodin Rrugor