Taulant Balla, kryetari i Grupit Parlamentar të Partisë Socialiste, u dërgoi këtë të martë, më 20 janar 2026, deputetëve të grupit një mesazh për nevojën e shqyrtimit me procedurë të përshpejtuar të aderimit të Shqipërisë në Bordin e Paqes.
Në mesazh thuhet: «Përshëndetje kolege dhe kolegë. Aderimi i Shqipërisë në Bordin e Paqes, pas miratimit nga Qeveria, do të kërkojë edhe ratifikimin/votimin në Kuvend. Prandaj ky proces do të kryhet me procedurë të përshpejtuar në respekt të Kushtetutës dhe Rregullores së Kuvendit sapo të vijë nga Këshilli i Ministrave. Ndoshta do kemi nevojë për një seancë në ditët në vijim. Ju lutem merrni masa paraprakisht për prezencën».
Deputetët socialistë duhet të jenë në gatishmëri për një seancë të mundshme para seancës së radhës parlamentare më 27 janar.
Kryeministri Edi Rama përmes një postimi në platformën X njoftoi se ftesa e presidentit Donald Trump për pjesëmarrje në Bordin e Paqes për Gazën do t’i përcillet Kuvendit të Shqipërisë për miratim. Rama falënderoi Trump-in dhe e cilësoi nismën si model transformues të ndërtimit të paqes në nivel global.
Disa burime raportojnë se ftesa është standarde dhe u është dërguar mbi 50 vendeve të botës.