Taulant Balla, kryetari i Grupit Parlamentar të Partisë Socialiste, deklaroi në emisionin Real Story se mazhoranca do të ndryshojë nenin 242 të Kodi të Procedurës Penale. Sipas tij, ndryshimet synojnë të sqarojnë se institucionet kushtetuese nuk mund të pezullohen nga detyra me vendim gjykate.
I pyetur nga gazetari Sokol Balla për mosvendimin 4 me 4 të Gjykatës Kushtetuese ndaj padisë së kryeministrit Edi Rama, Balla theksoi se Parlamenti ka detyrë të zgjidhë ngërçin kushtetues të krijuar. Ai argumentoi se interpretimi aktual i nenit hap mundësi për absurditete juridike, si pezullimi i Presidentit të Republikës, Kryeministrit, anëtarëve të Këshillit të Ministrave, Kryetarit të KLSH-së apo Avokatit të Popullit.
Ndryshimet e propozuara parashikojnë qartë se Presidenti, Kryeministri, anëtarët e Këshillit të Ministrave, Kryetari i KLSH-së, Avokati i Popullit dhe drejtues të tjerë të institucioneve monokratike kushtetuese nuk mund të pezullohen. Balla vuri në dukje se kjo praktikë zbatohet në vende të tjera europiane dhe se Gjykata Kushtetuese kishte mundësi ta zgjidhte çështjen, por nuk arriti për shkak të barazimit 4 me 4.
Balla theksoi se projektligji është gati dhe do të dorëzohet në Kuvend çështje orësh për votim.