Kryetari i Grupit Parlamentar të Partisë Socialiste, Taulant Balla, gjatë prezantimit të ndryshimeve në ligjin për “Turizmin” në Komisionin për Kulturën, Turizmin dhe Diasporën, ka paraqitur dokumente zyrtare lidhur me zhvillimet në zonën e Vlorës.
Sipas dokumenteve të publikuara nga Balla, vendimi që përcakton gjurmën e Aeroportit të Vlorës, si dhe ai për shpalljen e Nartës dhe Zvërnecit si zona me potencial për zhvillim turistik, janë miratuar në vitin 2009. Balla deklaroi se këto vendime mbajnë firmën e Sali Berishës, në cilësinë e kryetarit të Këshillit të Rregullimit të Territorit të Republikës së Shqipërisë (KRRTRSH).
“Po ju bëj publike se kush i ka firmosur vendimet për aeroportin e Vlorës edhe për zonën ndërtimore zhvillimore turistike në Zvërnec. Personi quhet Sali Berisha. Ja ku e keni,” u shpreh Balla para anëtarëve të komisionit.