Këtë të enjte u mbajt mbledhja e Komitetit të Përbashkët Ekzekutiv për kuadrin e bashkëpunimit mes qeverisë së Shqipërisë dhe Kombeve të Bashkuara.
Në këtë takim u vlerësua përmbushja e kornizës së bashkëpunimit 2022-2026 dhe rezultatet e arritura deri tani. Zëvendëskryeministrja Belinda Balluku, njëkohësisht ministre e Infrastrukturës dhe Energjetikës, deklaroi se 2026 është viti përmbyllës i këtij programi, ndërsa po nis përgatitja e kornizës së re 2027-2031.
Balluku theksoi në një postim në Facebook: "Ndërsa hyjmë në vitin përmbyllës të programit aktual dhe nis përgatitja për kornizën e re 2027-2031, mbetemi të angazhuar për të çuar përpara një bashkëpunim që fuqizon kapitalin njerëzor, nxit rritjen e qëndrueshme dhe konsolidon institucionet demokratike."
Ajo shtoi se qeveria shqiptare dhe partnerët e OKB-së do të vazhdojnë punën e përbashkët drejt një Shqipërie më moderne, më të fortë dhe më afër Bashkimit Europian.