Belinda Balluku vazhdon në detyrë, pavarësisht se pezullimi i saj u rikthye nga vendimi kontrovers i Gjykatës Kushtetuese.
Kryeministri Edi Rama u tha sot deputetëve të shumicës se qeveria do të ndryshojë Kodin Penal, për të pamundësuar pezullimin e atyre që mandatohen në detyrë nga Presidenti i Republikës. Kjo deklaratë u bë në një mbledhje të grupit parlamentar.
Vendimi i Gjykatës Kushtetuese për padinë e Edi Ramës u mor me rezultat 4 me 4, çka e bën atë jofinal. Analisti Martin Leka, i ftuar në emisionin Tirana Live, e cilësoi qëndrimin e Gjykatës si “as mish as peshk” dhe jo në shërbim të ligjit.
Sipas Martin Lekës, Gjykata Kushtetuese tregoi mungesë dinjiteti në funksionin kushtetutor dhe qe e paaftë për të dhënë drejtësi. Ai shtoi se një gjykatë e tillë dëmton institucionet, demokracinë dhe qytetarët shqiptarë.
“Gjykata Kushtetuese është gjykata e fundit ku pretendohet drejtësi. Ajo ka qenë e paaftë për të dhënë drejtësi. Një gjykatë e paaftë është e dështuar”, deklaroi Leka.