Bamir Topi, ish-President i Republikës, ka shprehur mbështetjen për nismën e kryeministrit Edi Rama për uljen e numrit të deputetëve në Parlament. Deklaratat i bëri në emisionin Frontline me gazetaren Marsela Karapanço në Report Tv, më 1 prill 2026.
Topi vlerësoi se një pjesë e madhe e ligjvënësve aktualë nuk kryejnë funksion të vërtetë, veçse ngrenë dorën sipas sinjalit. Ai i krahasoi ata me policin e trafikut, duke thënë se ky i fundit ndodhet në stres për shkak të numrit të madh të automjeteve në një vend pa semaforë, ndërsa deputetët veprojnë me mendje të ftohtë dhe kanë sjellë Parlamentin në ditën më të zezë.
Sipas Topit, kryeministri Edi Rama dhe kryedemokrati Sali Berisha bashkëpunojnë fshehurisht prej vitesh, pavarësisht perceptimit publik të kundërt. Ai theksoi se për ndryshimet kushtetuese duhen 2/3 e votave, prandaj bashkëpunimi do të vazhdojë. Topi shtoi se nuk është e nevojshme takimi fizik mes tyre, pasi ekzistojnë kanale komunikimi dhe Berisha ka mbi 1000 kanale me Ramën.
Ai vlerësoi se Rama nuk bën lëshime në negociata me opozitën dhe se dikton ai që drejton opozitën. Ndryshimet e pritshme, sipas tij, nuk krahasohen me ato të vitit 2008. Topi shprehu bindjen se Drejtësia do të prekë padiskutueshëm oborrin e kryeministrit Rama.