Qindra qytetarë u mblodhën këtë të hënë në Cërrik për të kundërshtuar propozimin për riorganizimin administrativo-territorial, i cili parashikon bashkimin e kësaj bashkie me atë të Elbasanit. Banorët argumentuan se shkrirja e bashkisë do të ndikojë negativisht në cilësinë e shërbimeve publike, përfaqësimin e komunitetit dhe zhvillimin ekonomik e social të zonës. Ata theksuan se Cërriku mbetet bashkia e dytë më e madhe për nga numri i popullsisë në Qarkun e Elbasanit dhe kërkuan shpjegime të argumentuara nga institucionet për këtë ndryshim të propozuar.
Sipas propozimit të Partisë Socialiste për hartën e re, numri i bashkive në Qarkun e Elbasanit pritet të reduktohet nga 7 në 4. Plani përfshin bashkimin e bashkive Prrenjas dhe Librazhd, si dhe të Belshit e Cërrikut me Bashkinë e Elbasanit.
Gjatë tubimit, protestuesit rikujtuan vlerësimet e mëparshme të Kryeministrit Edi Rama, i cili e ka cilësuar më herët Cërrikun si një shembull pozitiv të qeverisjes vendore. Pjesëmarrësit deklaruan se do të vazhdojnë aksionet qytetare derisa kërkesat e tyre të merren parasysh nga autoritetet qendrore. Ata i bënë gjithashtu thirrje administratës vendore që të bashkohet me kauzën për mbrojtjen e statusit të qytetit.
Në mbështetje të protestuesve ishin të pranishëm edhe deputetë të Partisë Demokratike. Nga ana tjetër, protestuesit u kërkuan deputetëve të Partisë Socialiste që përfaqësojnë Qarkun e Elbasanit të marrin një qëndrim publik mbi këtë çështje.