Banorët e zonës së Kënetës në Durrës kanë organizuar një protestë për të tërhequr vëmendjen e autoriteteve shtetërore ndaj përmbytjeve të banesave të tyre. Ngjarja ndodhi një ditë pas reshjeve të dendura të shiut, të cilat shkaktuan grumbullim uji për shkak të kanaleve të bllokuara.
Banorët raportojnë se kanë rreth 30 cm ujë në oborret dhe brenda banesave, duke i izoluar ata nga pjesa tjetër e zonës. Ata shprehen se uji nuk po tërhiqet dhe se dëmet janë të mëdha. Një banor deklaroi: "Uji nuk po tërhiqet. Të heqin ujin nga rrugicat dhe nga banesat sepse dëmet janë shumë të mëdha. Të vijnë të na shohin sepse jemi në mëshirë të fatit. Askush nuk ka ardhur nga grupet e verifikimit për të parë situatën. Jemi të izoluar nga uji. Nuk po na ndihmon askush."
Protestuesit theksojnë se kjo nuk është hera e parë që përballen me përmbytje. Një tjetër banor, i cili jeton me një familje prej 4 anëtarësh, shprehu ankesën e tij ndaj shtetit: "Kërkoj ndihmë. Jam i përmbytur, uji arrin deri në 30 cm. Nuk ka zgjidhje. Kjo është hera e dytë që përmbytemi dhe nuk kemi marrë dëmshpërblim." Ai përmendi se më parë u premtoi dëmshpërblim dhe u kërkua të hapin llogari bankare, por asgjë nuk u realizua.
Një banore tjetër foli për natën e stresit të kaluar me fëmijë të sëmurë në shtëpi të përmbytur: "Ne paguajmë taksat, detyrimin e shtetit, por të na bëjnë shërbimin. Askush nuk kam takuar. I kam marrë në telefon dhe nuk kanë çarë kokën fare." Një protestues i tretë shtoi: "E dimë që një kriminel është në Shqipëri, por e gjithë qeveria kriminela qenkan?"
Banorët kërkojnë heqjen e ujit, verifikimin e dëmeve dhe dëmshpërblim të menjëhershëm, duke nënvizuar mungesën e ndërhyrjes nga autoritetet.