Ish-presidenti amerikan Barack Obama ka përuruar zyrtarisht Qendrën Presidenciale në Çikago. Në ceremoninë e zhvilluar morën pjesë ish-presidentët Joe Biden (shoqëruar nga Jill Biden), Bill Clinton (me Hillary Clinton) dhe George W. Bush (me Laura Bush), si dhe ish-nënpresidentja Kamala Harris.
Ngjarja u shoqërua me performanca nga artistë të njohur si Bruce Springsteen, Stevie Wonder, Christina Aguilera, Bono dhe John Legend. Në qendër të vëmendjes ishin fjalimet e Barack dhe Michelle Obama, të cilët adresuan klimën e tensionuar politike në Shtetet e Bashkuara.
Michelle Obama vuri theksin te integriteti dhe vërtetësia, duke iu referuar teorive të konspiracionit për vendlindjen e bashkëshortit të saj, të njohura si “birther conspiracy”. Ajo renditi arritjet kryesore të presidencës së Obamës, përfshirë reformën në shëndetësi, rimëkëmbjen ekonomike dhe marrjen e Çmimit Nobel për Paqen.
Barack Obama reflektoi mbi vlerat e shërbimit publik dhe themelimin e Amerikës si një eksperiment radikal në vetëqeverisje. Ai theksoi se, pavarësisht dallimeve politike, çdo president ka synuar mbrojtjen e parimeve themelore të shtetit.
Donald Trump, i cili nuk ishte i ftuar, e ka cilësuar më parë projektin si një “katastrofë totale”. Ndërkohë, sipas të dhënave të CNN, Obama vazhdon të ketë mbështetje më të lartë publike (57%) se Trump (34%) dhe Biden (30%). Organizatorët njoftuan se qendra do të shërbejë si një hapësirë reflektimi dhe qetësie për publikun.