Mosmarrëveshja ligjore ndërmjet FC Barcelona dhe presidentit të Real Madrid, Florentino Pérez, ka hyrë në një fazë të re pas vendimit të gjykatës në Madrid për të thirrur palët në një seancë pajtimi. Seanca është caktuar të mbahet më 25 nëntor 2026, në orën 09:40. Ky veprim vjen si hap paraprak pas kërkesës së dorëzuar nga klubi katalanas në qershor, lidhur me deklaratat e bëra nga Pérez gjatë një konference për shtyp më 12 maj.
Në atë periudhë, presidenti i Real Madrid foli gjerësisht për "rastin Negreira" dhe pagesat e bëra ndër vite nga Barcelona ndaj ish-zëvendëspresidentit të Komitetit Teknik të Gjyqtarëve në Spanjë, José María Enríquez Negreira. Pérez e cilësoi çështjen si një ndër skandalet më të mëdha të korrupsionit në histori dhe pretendoi se klubi i tij është dëmtuar drejtpërdrejt në garën për titull. "Kam fituar shtatë liga. Mund të kisha fituar dyfish. Të tjerat m’i kanë vjedhur", deklaroi ndër të tjera Pérez.
Departamenti ligjor i Barcelona ka vlerësuar se këto pretendime dëmtojnë rëndë imazhin dhe reputacionin e klubit. Klubi katalanas kërkon që Florentino Pérez të tërheqë zyrtarisht këto deklarata. Nëse presidenti i Real Madrid refuzon të pajtohet gjatë seancës së nëntorit, Barcelona ka njoftuar se do të nisë një proces penal për shpifje. Ndërkohë, në lidhje me vetë "rastin Negreira", Barcelona ka mohuar çdo parregullsi, duke sqaruar se pagesat janë kryer për raporte teknike dhe analiza arbitrimi, ndërsa një gjykatë spanjolle kishte rrëzuar akuzat për ryshfet ndaj klubit në vitin 2024.