E ardhmja e mesfushorit Marc Casado te Barcelona mbetet e pasigurt, ndërsa drejtuesit e klubit katalanas janë shprehur të gatshëm për të shqyrtuar ofertat që vijnë për të. Sipas raportimeve të gazetës spanjolle Mundo Deportivo, trajneri Hansi Flick u ka bërë të ditur zyrtarëve të klubit se nuk do ta kundërshtonte transferimin e lojtarit, pasi skuadra aktualisht paraqitet me mbingarkesë në repartin e mesfushës. Ky qëndrim mbetet i pandryshuar edhe pas shqetësimeve shëndetësore të Frenkie de Jong dhe paqartësive nëse mesfushori holandez do t'i nënshtrohet një ndërhyrjeje kirurgjikale.
Pas refuzimit të një oferte fillestare që nuk përmbushte pritshmëritë financiare të klubit, Barcelona ka vendosur ta rrisë vlerën e kartonit të futbollistit. Çmimi i kërkuar për 22-vjeçarin është caktuar në 40 milionë euro. Duke qenë se lojtari është produkt i akademisë La Masia, shitja e tij do të përbënte fitim pothuajse të pastër për klubin në aspektin e Fair-play financiar, pasi nuk do të kërkonte kosto amortizimi.
Në aspektin sportiv, minutazhi i Casado-s ka pësuar rënie gjatë periudhës së fundit. Në sezonin 2024/25, ai ishte lojtari i dhjetë më i përdorur, duke regjistruar 2447 minuta dhe duke siguruar ftesën e tij të parë nga kombëtarja e Spanjës. Megjithatë, në sezonin e kaluar, pjesëmarrja e tij në fushë zbriti në 1397 minuta, duke e pozicionuar si lojtarin e 18-të më të aktivizuar të ekipit. Së fundmi, Casado ka luajtur pjesën e dytë të takimit miqësor kundër Europas, ku Barcelona shënoi fitore me rezultatin 4-1 në qendrën stërvitore të klubit.