Barcelona do të përballet me Albaceten në çerekfinalet e Kupës së Mbretit të Spanjës. Shorti i hedhur këtë të hënë ka caktuar ndeshjen të luhet në stadiumin Estadio Carlos Belmonte, fillim të muajit të ardhshëm.
Albacete, skuadër e kategorisë së dytë spanjolle, eliminoi Real Madridin në të tetat e finales me rezultat 3:2. Barcelona avancoi duke mposhtur një skuadër tjetër të kategorisë së dytë, Racing Santandern.
Barcelona konsiderohet favorite kryesore për trofe bashkë me Atleticon e Madridit, pas eliminimit të Real Madridit. Kjo është hera e parë që të dy skuadrat përballen në Kupën e Mbretit. Në La Liga, kanë luajtur 14 ndeshje: 9 fitore për Barcelonën, 4 barazime dhe 1 fitore për Albaceten. Takimi i fundit daton më 1 maj 2005, kur Lionel Messi shënoi golin e parë me fanellën blaugrana.
Albacete ka vazhduar formën duke fituar 1-0 ndaj Cadizit në kampionat të dielën, duke u ngjitur në vendin e 14-të në Divizionin e Dytë me 27 pikë, 4 më shumë se zona e rënies.