Barcelona po shqyrton ofertat për sulmuesin Ferran Torres, sipas mediave spanjolle. Klubi katalanas planifikon ndryshime në fazën sulmuese gjatë afatit kalimtar të verës.
Ferran Torres, 26 vjeç, nuk ka të ardhme te Barcelona. Ai ka kontratë deri në vitin 2027, por klubi nuk dëshiron ta humbasë me parametra zero dhe preferon shitjen e tij. Sipas ESPN-ut, pas ofertave për Torresin do të vijë ardhja e dy sulmuesve të rinj.
Drejtori sportiv i Barcelonës, Deco, po punon për të gjetur një numër 9 të ri titullar. Një nga objektivat kryesorë është Julian Alvarez nga Atlético Madrid. Opsioni tjetër është blerja përfundimtare e Marcus Rashford nga Manchester United.
Barcelona ka mundësinë të shfrytëzojë opsionin e blerjes së sulmuesit anglez për rreth 30 milionë euro. Megjithatë, klubi shpreson ta ulë këtë shumë ose ta zgjasë huazimin e tij për një sezon tjetër.